يوم الكرامه

طبعا أي حد هيسأل ايه هوا يوم الكرامه ده بالنسبه ليا؟
لأن الطبيعي اننا في بلدنا ديه شبه ملناش كرامه.
او بمعني ادق لينا كرامه بس محدوده.
و لكن علي رأي الحزب الوطني بلدنا بتتطور بينا.

القصه و ما فيها انه كان عندي خط فودافون نوعه فري600.
إللي ميعرفش ايه النظام ده اقول له.
انت بتدفع 195 جنيه اشتراك شهري و تحصل علي 600 دقيقه لأي موبايل فودافون ببلاش طول الشهر و لو متكلمتش بيهم او فضل منهم حاجه بيتحولوا لك الشهر إللي بعده.
مش كده و بس لأ و ليك نمره واحده تختارها و تكلمها ببلاش طول الشهر بثلاث اضعاف الدقائق ديه.
انا كنت شغال فري600.
و كنت ماشي في الشارع و فرحان و بقول زي الإعلان انا فودافون.

جالي سفر في شهر 8 لأيرلندا.
سبت الخط مع اخويا و سافرت و قلت له روح اقفله بعد ما تتكلموا في الخط الشهر ده و قفل رصيد الشهر.
اخويا لما راح يقفله رفضوا، و قالوا ان الخط ده ملكيه خاصه زي الشقه و العربيه و مينفعش يتقفل إلا بتوكيل رسمي في الشهر العقاري.
طبعا انا مسافر و الفواتير بتتراكم و زي الفل.
وصلت الفواتير لحد 564 جنيه.
فواتير 3 اشهر، و بعد كده الخط اتقفل.

رحت اول السنه بعد ما رجعت لمصر لفرع فودافون.
قلت بقا ايه هيظبطوني و يعملوا لي تخفيض عشان انا راجل كويس و جي ادفع إللي عليا.

و بالفعل ظبطوني.

اخدت رقم و لقيت نفسي واقف امام احدي الفتيات العاملات هناك.
و طبعا اختيار الفتيات في فودافون للتعامل مع العملاء بيكون مميز.
لازم تكون واثقه من نفسها و انيقه و صاحبة ابتسامه عريضه و لازم تكون لابسه حاجه حمرا.

المهم بدأت اتكلم مع البنت و اشرح لها الوضع من ناحية السفر و كده.
قالت ديه غلطتك يا فندم كان لازم تيجي بنفسك.
قلت لها دلوقتي انتوا عايزين مني ثمن ثلاث فواتير من نوع فري600 و إللي انا فاهمه ان فيه رصيد بيتحول كل شهر.
ردت وقالت لأ مفيش رصيد هيتحول ليك لأن الخدمه وقفت.
قلت لها طيب و انا ادفع ليه كل المبلغ ده.
ردت و بأنشكاحه عريضه علي وشها: هتكون من عملائنا المميزين.
قلت لها يعني المفروض اني ادفع 564 جنيه عشان ابقي من عملائكم المميزين.
ضحكت و قالت آآآه.
قلت لها و المفروض لو مدفعتش ايه إللي يحصل، قالت مش هتكون عميل مميز.
قلت لها يعني انا بدفع ليكم الفلوس ديه عشان ترضوا عني.
ضحكت و قالت براحتك و بعد كده هتطالب بدفعها في المستقبل.

تخيلوا لو حد مكاني المفروض يعمل ايه؟؟؟
الكوميديا اني دفعتها.

بس اتخنقت قوي.
و سألت نفسي هوا انا عبيط قوي كده؟
انا دفعت ليه؟
المفروض مدفعش لأن ده ظلم.
العقد نوعه فري600 و اشتراكه 195 جنيه في الشهر عشان خاطر بيعطيني دقائق مجانيه.
يروحوا واخدين مني كل الفلوس ديه و ما خدش حاجه؟

قررت اني اشتكي فودافون العالميه.
لقيت ان اول طريق هوا فودافون مصر.

بالفعل بعت إي ميل شديد اللهجه إلي فودافون مصر اشكي لهم مشكلتي.
قلت لهم في النهايه انكم لا تسعون إلي إرضاء العميل و لكنكم تسعون إلي إرضاء ذاتكم.

لقيت امس إي ميل منهم بيطلبوا مني المزيد من المعلومات.
بعثت لهم المزيد من المعلومات عن مشكلتي.
و طلبت منهم تسوية مشكلتي بإما إعطائي المكالمات المجانيه التي هي حق لي.
أو حساب الخط الخاص بي علي انه من النوع الطبيعي و اشتراكي الشهري يكون بواقع 35 جنيه فقط و ليس 195.

و كان ردهم بأنهم سيقوموا بحساب 35 جنيه فقط عن كل شهر و سيتم رد مبلغ 461 جنيه و خيروني بأن يبعثوا لي رصيد بهذا المبلغ.
أو الإنتظار حتي يوم 16 لحين صدور الفاتوره الجديده و ان احصل علي هذا المبلغ نقديا من احد فروع فودافون.
و كان اختياري هو الحصول علي المبلغ النقدي مره اخري.

حسيت ساعتها ان الواحد لسه عنده كرامه يا جدعان.
و مش بتضرب علي قفايا و خلاص زي كل مره.

السؤال الطبيعي هل انا أحب ما فعلت؟
ام فعلت ما احب؟
انا لا اعلم لماذا دفعت الفلوس في البدايه و لا اعلم لماذا طلبتها من ثاني.
و لكن هذا ما حدث.

و دلوقتي اقدر امشي و اقول؛ انا فودافون.