استمتع بأجمل نعمة في الدنيا.........

فكرت لحظه ايه امتع حاجه ممكن تحسها
فكرت ايه متعتك إللي لما تعملها تكون مبسوط و آخر مزاج
فكرت إزاي ممكن تعيش حياة ممتعة و في منتها السعادة

الجواب بسيط، و معروف من زماااااااااااااان
و انت إللي مش عارف تاخد بالك منها
أنت إللي لسه مدوقتش طعمها

ألا و هي الزوجه الصالحة......!!!!
متخيل إن ديه امتع حاجه في الدنيا؟؟؟
متخيل ان ديه اكتر حاجه تبسطك و تحلي حياتك للأبد؟؟؟

قال رسول الله صلى الله عليه و سلم
الدنيا متاع و خيرها المرأة الصالحة
رواه مسلم

ما احلى الحياة في ظل هذه الزوجه
التي إذا غبت عنها حفظتك في نفسها، و تعلقت بك بكل إشتياق
و إذا اتيت إليها وجدتها في اجمل زينة و في شدة الترحاب بك
و إذا امرتها بشيء أو قلت لها شيء فعلته لك بكل حب و دون ادنى ملل

إن هذه المرأة إذا وجدتها، إياك ان تتركها و تغيب عنها.
إياك ان تحزنها في يوم، فستأسف و تحزن بداخلك كثيرا لما سببته من اذى لمشاعرها.
إياك ان تتوقف عن تحقيق امنياتها، فإنها تصرف حياتها ملكا لك، فلا تبخل عليها بأمنيه.

إن هذا المقام ليس مقام تفصيل عن شروط الزوجة الصالحة.
و ليست مقام، جدال بين حقوق الزوجين على الآخر.

إنما هو مقام إعزاز و تقدير لكل زوجة صالحة، و لكل زوج اكرم زوجته من اجل ان يشعرها بالسعادة الأبديه

اسأل الله لكل الإخوة و الأخوات ان يرزقهم الزوجة و الزوج الصالح

تحية للشهداء، و تحية خاصة للثوار

الله اكبر الله اكبر الله اكبر لا إله إلا الله
الله اكبر الله اكبر الله اكبر و لله الحمد

لقد إنزاح الطاغوت
لقد إنزاح الطاغية
لقد عادت الكرامة للمصريين

و لإزالة الباطل كان لزاما من مجاهدين حق الجهاد.
من مقاتلين من أجل الحق.
من عاملين من اجل المستقبل.
فتحية لكل شهيد من إخواننا الذين استشهدوا من أجلنا.

تحية إعزاز و تقدير لكم أيها الشرفاء الذين أبيتم الظلم.
و خرجتم من أجل إعلاء كلمة الله.
و كلمة الله هي العدل، الحرية.
و منكم من خرج و بنيته من كلمة الله الإيمان به.
فأسل الله أن يتقبل منكم حسن النية.
و أسأل الله أن يغفر لكم سوء القصد.

و تحية لكل من نزل و لم يخش لحظة النظام و ظلمه.
و لكل من تم أسره، أو إصابته بطلقة أو قنبلة غاز أو حتى طوبة و صاعقة كهرباء أثناء المظاهرات.
و أخص بالتحية المبادرين في مظاهرات 25 يناير.
ثم جمعة الغضب 28 يناير صاحبة الفتح الحقيقي.

أما الذين قعدوا في بيوتهم و لم يتحركوا
فأخص منهم بالشكر من وقفوا بجانب إخوانهم في اللجان الشعبية لحماية بيوتهم بينما هم في التحرير.

أما الذين قعدوا في بيوتهم و لم يتحركوا.
و الذين خافوا أو تخازلوا.
فأسأل الله أن يعزكم، و يرزقكم قوة لبناء هذا الوطن.

و الآن، ستعود الحياة.
و لكن بالإصلاح القادم.

إصلاح في كل الأحوال.
في الفرد، و البيت و المنطقة و البلد.
فلقد حان الوقت لنبني بلدنا.

لن نتخازل عن بناء و تطوير بلدنا الحبيبة مصر.
إنه الوقت الآن للعمل.

هيا بنا نعمل على إزالة جحيم الخوف.
و ظلمات اليأس و الخنوع.
و لننير الطريق بالإيجابية و الحركة النشطه.

ستقوم مصر الآن بسواعد أبنائها.
و ليست بسواعد أصحاب التسلط.

ستبنى بأموال طاهرة.
و ليست بأموال الخبث و المحسوبية.

ستبنى بعقيدة الحق و العدل.
و ليست بعقيدة الظلم و السخرة.

مصر بلدنا الآن، و نحن سنبني مستقبلنا معا جميعا.
مع الثوار، مع اللجان الشعبية، و مع القاعدين سابقا.
ليس لأحد من الآن فصاعدا فضل علينا، سوى شهداء الثورة.
فعلينا تبجيلهم و توقيرهم.
و نسأل الله لهم الغفران و تقبلهم.

و سآتي لاحقا بإقتراحات و تجارب الآخرين في بناء مصرنا إن شاء الله.

الإسلام هو الحل!!!

كان فيه واحد زمان مصري نايم و مستمتع بالنوم.
أزن عليه الفجر و نزل يصلي.
راح جاب الجرنان، و شوية نقانق من الفران عشان يشرب شاي الصباح و يروح شغله

فوجئ بخبر عجيب في الجرنان.
انقلاب علي الملك، و العسكر يفرض الحراسه علي الملك فاروق.
و بعد كام شهر فوجئ بحاجه جديده اسمها جمهورية مصر العربيه.
فوجئ برئيس جديد للبلاد، من بني جلدته.
مهواش عثماني و لا اوروبي و لا حتي عربي.
ده مصري أصلي، أينعم محمد نجيب اصله سوداني، بس برده مصر و السودان بلد واحده.

المصري ده كان شغال عند راجل يهودي عنده مجموعة محلات كتير.
كان مستثمر و عنده اكبر محلات اقمشه في البلد.
كان الراجل اليهودي مصري و كسيب.
كان بيشتري القطن من واحد باشا في الغربيه يمتلك 20 الف فدان.
و الباشا كان مشغل عنده فلاحين و عمال و ملاحظين.
و كان الباشا بيزرع قطن و يبيع لليهودي يشغلهم في مصنع واحد مسيحي صديقه مشغل عنده ييجي 200 عامل.
بيصدروا لأنجلترا و السعوديه و الأردن و سوريا.

شويه و لقي الرئيس محمد نجيب تم تنحيته و جه مكانه جمال عبد الناصر.
قال تعالوا نجيب ارض الباشا و نوزعها علي الفلاحين.
و ناخد مصنع المسيحي و متاجر اليهودي و نأممها.
و عملوا حاجه اسمها اشتراكيه.

الراجل طار من الفرحه.
أخيرا مش هيشتغل عند اليهودي.
اخيرا هيمتلك شيء من المتجر.
أخيرا اليهودي مش هيقول له خد عيديتك و واحد مصري هيديهاله.

المصري مسك المصنع.
المصري طلع من الحكومه.
المصري عين ابن عمه، و كان ساقط ابتدائيه.
ابن عمه مكنش همه المتجر، لأنه كان عايزها وظيفه يشتغل فيها جمب الحزب.

المتجر بدأ ينهار.
محدش بقا بيشتري زي زمان.
ما هوا الفلاح امتلك الأرض، و بنى عليها بيت.
و باع أرضه عشان يعلم ولاده و يعلي البيت و يجوزهم.

الحاله بقت كحت.
و الجبنه الرومي إللي كان بياكلها زمان، بقي بيتفرج عليها.
و المربه إللي كان بياكلها دلوقتي بقا بيسمع عنها في الأخبار.
و البلد بتتنهب، و الناس بتعتقل و حصلت النجسه.

جمال عبد الناصر مات، و جه السادات.
قام السادات بالحرب، و عمل معاهدة سلام.

الراجل صاحبنا لسه في محله بيقاتل عشان ياكل عيش.
السادات قال هنعمل انفتاح، و نجيب سلع من بره.
الراجل فوجئ بحاجه جديده اسمها تي شيرت.
مجتش عنده في المحل.
الواد ابنه جاله في يوم قال له بص يابا انا جبت ايه.
و لقي الناس في الشارع كلها لابساها هيا و هدوم جديده كلها من بره.

الراجل قال هوا القطن بتاعنا راح فين.
هوا المصنع إللي كان شغال راح فين.
و السادات إزاي يفتحها كده علي البحري.
مش الثورة قامت عشان تحارب الجشع الرأسمالي.

مات السادات، و جه مكانه حسني مبارك.
و الوضع كان ماشي زي ما هوا.
فيه ناس بتغتني و بتتاجر و بتجيب توكيلات.
و الناس إللي تبع القطاع العام مفيش جديد.

الراجل شغل ابنه معاه في المتجر.
و فاتت الأيام، و الراجل طلع معاش.
و ابنه فضل ييجي عشرين سنه يفضل شغال و مفيش جديد.

و في يوم من الأيام، قررت الحكومه خصخصة المتجر.
و الواد صوت، راح لأبوه ألحق يابا.
هيخصخصوا المصنع و هيطردونا كمان.
أبوه قاله يابني متخافش، ده هيرجع زي زمان أيام الملك.

المستثمر أخد المتجر، و غير شكله.
و سرح شوية عمال، و جابلهم يونيفورم محترم.
المتجر مجابش همه خلال سنتين.
أرض المتجر كانت غاليه جدا، و المتجر مش بيكسب.
قرر المستثمر يبيع الأرض و يهد المتجر و يبنيها عمارات.

الواد قال لأبوه هوا أيه إللي بيحصل يابه.
قاله مفيش يابني.
غير اننا كطيع من البشر.
بيحكمنا بشر و بيغيروا النظم و القوانين.
و إللي شايفينوا ينفع بينفزوه علي الشعب.

الواد قال لأبوه و بعدين يابه، هوا الدستور مش لازم يحترم.
و مفيش ريس يغير علي إللي قبله.
قاله يابني الدستور ده مش قرآن.
ممكن أي حد يغيره.

قاله و مفيش حد هيحاسب الناس ديه يابه.
قاله ربنا موجود يابني هيحاسبهم علي إللي بيعملوه.

و هوا ربنا ليه ميوضحش للناس ديه أن إللي بيعملوه ده ميرضيهوش.
الراجل قاله يابني ما القرآن بيقول كده مينفعش.

نعم يابه؟ يعني القرآن بيقول مينفعش جمال عبد الناصر ياخد أرض الباشا و مصنع المسيحي و متجر اليهودي؟
يعني القرآن بيقول مينفعش نعمل انفتاح و احنا حالنا واقف من غير صناعه؟
يعني القرآن بيقول إزاي تخصخصوا و تهدروا حقوق العمال و الأرض بسعر بخس؟
قاله أيوه يابني أي بني آدم بيتقي ربنا، و يعرف دينه مكانش هيعمل كده.
و كان العلماء يقفوا امامه و يقولوا له انت غلط و بتخالف شرع ربنا.
حتى لو المصالح تدخلت و فيه ناس معاها القوه و مسيطره.
هيفضل فيه علماء بيقولوا كده حرام و مخالف لشرع ربنا.

طيب ما هوا العلماء بيقولوا يابه حرام و كده مينفعش.
قاله ما هوا الحكام بيقولوا ان ده مهواش قرآن و الدستور بيقول كده.

الواد اتعجب!!!!
إزاي يابه؟ احنا مش بلد إسلاميه؟
إحنا مش بنقول اننا مسلمين؟
مش ربنا هيحاسبنا علي إللي مكتوب في القرآن؟
إزاي مبنتحركش؟ إزاي منحكمش زي ما ربنا بيقول؟

الراجل أتعجب!!!
هوا صحيح محدش فينا فكر كده ليه؟
هوا احنا كل ما واحد يصحي الصبح و يغير النظام و يختار حاجه، إحنا مش بقف ادامه ليه؟
هوا ليه إحنا سايبين القرآن و شوية ناس يقولوا رأسماليه، إشتراكيه، انفتاح، رأسماليه مقننه؟

ما القرآن فيه حاجات تانيه احسن كتير.
و فيه نظام اقتصادي، و سياسي و اجتماعي.

و بعدين القرآن مش من وحي بشر، ده من وحي ربنا إللي خلق البشر.
يعني عارف كتالوج الحياه إللي تنفعهم.
بدل ما نصحى كل يوم الصبح و نلاقي واحد بيجرب فينا.
ما نجرب احسن إللي رب البشر عملوا لينا؟؟

الواد ساب ابوه و نزل الشارع.
لقي فيه إنتخابات.
راجل بيقول تعالوا انتخبوني، و هنعمل نظام رأسمالي.
راجل تاني بيقول انتخبوني، و هنعمل نظام اشتراكي يحافظ علي حقوقكم.
و راجل تاني بيقول، تعالوا انتخبوني و هنحكم بالقرآن!!!!!!

الواد بص كده.
و شاف يافطه مكتوب عليها الإسلام هو الحل و شاف يفط تانيه كتير.
الواد سأل نفسه، هوا احنا لسه محرمناش؟؟؟

هل يا تري، الواد ده هيفعل ما يحب، و ينتخب إللي شايف انه صح ينتخبه؟
وللا هيحب ما يفعله، و ينتخب إللي هيديله مصلحته في الدنيا و الآخره لربنا؟

انا زعلاااااااااااااااااان ........... :D

ساعات بسأل نفسي يعني ايه انا زعلان.

يعني ايه انك من جواك تحس انك متضايق.

طيب لو انت زعلان من جواك، ليه تصرفاتك بتوضح كده.

ليه الناس إللي حواليك بتحس انك زعلان.

هوا المفروض افعالك تدل علي كده وللا لأ؟

هيا المفروض الناس إللي حواليك تحس بأنك زعلان وللا لأ؟

طيب لو الناس حست انك زعلان، ايه المفروض يعملوه.

المفروض انهم يطبطبوا عليك ويقولوا لك متزعلش؟

وللا المفروض يعرفوا الأول إذا كان عندك حق تزعل وللا لأ؟

و ساعتها يقرروا إذا كان يطبطبوا عليك وللا لأ؟

طيب لو كان الزعل ده من شخص معين، و عرف انك زعلان.

هل من واجبه كصديق أو قريب، ان يصالحك، ثم يوضحلك حقيقة الأمر؟

ام انه ينظر هل من حقي ازعل وللا لأ، ثم بعد ذلك يقرر ماذا يفعل؟

طيب لو كان معنديش حق ازعل، المفروض يحصل ايه؟

يصالحني و بعد كده يوضحلي؟

وللا يعلمني الصح ايه، و بعد كده انا اصالحه لأني زعلت منه غلط؟

دائما و ابدا لم اتسائل هذه التساؤلات.

لعدة اسباب، لأنه ليست لدي قناعة بأنني ازعل من حد.

و لأني دائما اعمل جاهدا اني مزعلش حد.

لأني دائما و ابدا احاول ألا أسيء إلى احد و احرص جدا علي مشاعر الآخرين.

فأتخيل ان الآخرين سيحرصون علي مشاعري كما حرصت عليهم.

و إذا اسأت إلي احد و قلت كلام قد يكون جارح لمن امامي.

احاول أن أاتأسف علي سوء الكلام، حتي و لو لم أخطيء.

فربما اصاب هذا الكلام شيء في من امامي، فيكون حقا علي تصحيحه.

فأحاول جاهدا ان ألوم نفسي و أن أصلح من علاقتي مع الآخرين.

فأنني لا أتمني شيء من هذه الدنيا إلا الكلمه الطيبه.

عسى ألا يوقفني احدا امام الله بسبب مظلمة، قلتها في حقه.

كم كنت اتمني ان يكون هذا شعور كل من حولي.

و لكن الحقيقه اننا لسنا جميعا مثل بعضنا البعض.

كل منا له اسلوب في حياته و طريقته في تقييمه للأمور.

فقد يقول لك شخص صديق لك منذ زمن كلام يصيب شيء بداخلك.

او يقول قريب عزيز لك ما يصادف انه يحزنك.

قد لا يكون يقصد مثل هذا الكلام علي الأطلاق.

و قد يكون العيب انك انت احسست بكلام في عكس موضعه.

و لكن ماذا علي هذا الصديق ان يفعل؟

ما واجب هذا القريب تجاهك؟

هل من واجبه تجاهلك؟

ام من واجبه مواساتك و إيضاح حقيقة الأمر؟

ام واجبه فقط إيضاح حقيقة الأمر بدون ان يتعاطف معك و لو للحظه؟

لقد اعتقدت لفطرة طويله، ان من واجبه مواساتك ثم إيضاح حقيقة الأمر.

لأنني احب ان افعل هذا مع من هو قريب بالنسبة لي.

للأسف الآن يجب ان اتوقف عن ارادتي بهذا كأسلوب للتعامل.

يجب ان اتقبل من صاحبي ما يختار من اسلوب.

إن كان اختياره ان يتجاهلني، فهذا لا يعني انه لا يحبني.

و لكن هذا يعني انه ليس لدي حق ان ازعل علي الأطلاق، و اصالح نفسي.

ثم تعود حياتنا طبيعيه لأننا اصدقاء و احباب.

إن كان إختياره ان يوضح حقيقة الأمر و فقط.

فسأتقبل كلامه و أتأسف لسوء فهمي له.

و إن كان يواسيني ثم يوضح حقيقة الأمر، فهذا لا يعني اخلاص هذا الشخص لي و تميزه.

إنما هو اسلوب طبيعي من الأساليب التي يختارها المرأ و مثله مثل أي شخص آخر.

في النهايه اقول نصيحه لكل من يقرأ مقالتي.

إذا زعل احد منك و انت لا تقصد.

فأولا، إذهب لتعتزر له بالرغم من عدم خطأك، ثم أوضح له حقيقة الأمر.

و لو كنت لا تريد مثل ذلك، فالتوضح له حقيقة الأمر دون ان تعتذر له.

و لكن ابتعد عن ان تفضحه امام الآخرين و تقول له انه مخطىء.

و دعه يحاول جاهدا ان يعدل من اسباب الزعل الخاطئ.

و إن اردت ان تتجاهله، فلا يجب ان تستمر صداقتكم.

و لكن اخيرا، يجب عليك ان تتذكر عظم ثواب ان تنام و ليس لديك غلاً لأحد

عسى ان تكون مع الصحابي الذي قال عنه النبي، يدخل عليكم الآن رجل من اهل الجنه.

إلي آخر الحديث، فكان سبب دخوله الجنه، انه لا ينام ابدا و في قلبه غلا من احد.

حقيقة انني اتسائل الآن من داخلي.

هل انني إذا فعلت هذا و تقبلت الأساليب الثلاثه من صديقي.

هل سأفعل ما احب؟

ام سأحب ما افعل؟

اريدك ان تنظر معي، لو كنت مكاني ماذا كنت لتفعل؟

و ماذا سيكون تقييمك لصديقك إذا اختار كل أسلوب من الثلاثه؟

لأنني حقا احتاج نصيحتك.

إصابة ملاعب !!!

بحب الرياضه جدا.
بحب اجري في الشارع لو مليت من أي مسافه امشيها.
لو مخنوق و عايز افك عن نفسي بحب اجري.
و بحب الكوره في الرياضه بالذات.

الكورة لعبه جماعيه.
لعبة تستخدم فيها كل امكانياتك.
بدنيه، مهاريه، خلقيه، و اجتماعيه كمان.

و لكن لأنها مهارة جماعية فبسبب النفوس المختلفه تتكون في بعض الأحيان العداوات.
عداوة بسبب سوء خلق البعض.
بسبب حب المكسب و كراهية الخسارة للبعض الآخر.
أو أي اسباب تشعل الكراهيه في نفوس المتنافسين.

و لطالما منذ الصغر و انا ابتعد عن اي مشاحنات او عداوات.
فكان هذا سبب في سلامتي و عافيتي من إصابات الكره.
فأحمد الله كثيرا علي ذلك.

و لكن لا يسلم المرأ من الإصابات.
فلكل رياضه و مهاره مساؤها.

فالذي يقفز بالمظلات من علي ارتفاع 1000 قدم يعتبرها مسليه.
لأنه يأخذ معه المظله الأساسية، و كذلك الإحتياطي.
و يأخذ القسط الكافي من التدريب قبل محاولة القفز.
و لكن هذا لا يمنع ان قليل من الإرهاق اثناء هبوطه قد يتسبب في اختلال تركيزه و ارتطامه بالأرض بعنف.

كذلك في الكره و أي رياضه اخري.
فضريبة المهارات، انك تقوم بعمل حركات خطره و غير متوقعه بالنسبه للآخرين.
هذه الحركات بالرغم من بساطتها و لكن قد تتسبب في إصابات شديده.

و هذا ما حدث لي.

مباراه مع الأصدقاء في منتهي الود و البساطه.
يستعرض كل واحد منا مهاراته لأنه علي يقين ان الآخرين لن يقوموا بالإحتكاك العنيف معه.
و مع كل حركه تكون هناك الخطوره المصاحبه لها.

كنت اجري بسرعة انا و منافسي علي الكره.
و بحكم خفة وزني ، كانت زيادة سرعتي.
قررت ان اقوم بحركة عكسية 180 درجه.
بحيث ان اجعله يكمل جريه للأمام، بينما انا اتراجع مباشرة للخلف.

بنسميها في لغة الشارع، اخليه يروج يجيب فول.

و لكن ليس كل ما يتمناه المرأ يناله.
سبقتني الكره بسنتيمترات، فتسببت في فشل الحركة بالكامل.
و زحفي إلي إتجاهها، و إنحناء رجلي الثابتة تحتي مما تسبب في كسر عظمة الفابيولا في تجويفها مع التابيولا.

فبدل صاحبي ما يجيب فول.
انا جيبت الفابيولا.

في البدايه وقعت علي الأرض و احسست بالألم.
و لكن كان اكثر تركيزي هل هذا كسر ام مجرد تمزق في الأربطه.
فطوال عمري لم اصاب بكسر ابدا.

حاول بعض الأصدقاء لمس رجلي و لكن الألم كان حقا شديدا.
و قفت علي الرجل الأخري و حاولت ان اقف علي اليسري المصابه.
للأسف لم استطع ان المس الأرض بها.

ادركت ان هناك شيئا ليس ببسيط.

حملني الأصدقاء و ذهبت إلي اقرب مستشفي و هي رابعه.
و بعد ان دخلت لدكتور العظام هناك.
و بعد الكشف علي، احسست من وجهه بالخوف.

بعد ظهور الآشعة وجدته كسرا.
فقررت الذهاب إلي مستشفي آخر.
ذهبت إلي دار الحكمه و هي مكان اكثر من رائع في عباس العقاد.
فقال لي نائب العظام، عندك كسر و يستلزم هذا جراحه و شريحه بمسامير.

أول مره اسمع عن الشريحة و المسامير كان في حادثه لراقصه تسمي شريهان.
و منذ ذلك الحين اعرف انه بعد الحوادث الكبيره و التهتك القوي يتم إجراء هذه الجراحات.

و لكن عندما قال لي الدكتور الخبر.
تخوفت ان يكون الأمر مجرد بيزنيس.
يختلقه البعض ليتكسب منه.

جبست رجلي و ذهبت إلي مستشفي اخري و هي النزهة الدولي، و ياليتني ما ذهبت.
قابلني نائب العظام هناك اقل ما يوصف عنه هو السماجه.
المهم اقر الموقف الطبي و قمت في اليوم التالي بإجراء الجراحه.

و الحمد لله ركبت شريحة و اربع مسامير لعلاج العظمه المكسوره.
و مسمارين آخرين لتثبيتها في العظمات الأخري لنمو الأربطه.
زائد حاجه بتاعة 24 دبوس عشان الجرح.
ادركت معني كلمة الشريحة ديه دلوقتي وقتها.

طبعا عشان الناس إللي بتستظرف ديه شريحة جديده.
مش بتبعت ولا بتستقبل.
و مهياش فودافون و لا اتصالات.

احمد الله علي كل حال.

العجيب انني لم يتملكني شيء سوي الضحك.
هل من المعقول ان حركه بسيطه تسبب كل هذه النتيجه.

بالتأكيد سأفتقد كثيرا الأصدقاء في العمل و المنطقة الذين كنت القاهم.
و اكثر ما سأفتقده حقا.
هي الصلاة في مسجدي و بخاصة يوم الجمعه.

اعتقد انني سأشتاق إليها حقا.
خاصتا انه علي ان ابقي رجلي في وضع افقي لمدة شهر.
إلي ان اقوم بعمل جراحة اخري لنزع مسامير التثبيت.

اتمني العودة إلي الحياة الطبيعبة مره اخري.
و اتمني ان اراكم علي خير جميعا مرات اخري عديده.

اشكر كل من اتصل ليطمأن علي.
فحقا لقد ادخلتم السرور علي.

لا انصحكم بالتوقف عن ممارسة الرياضه.
و بأخذ حرص اكثر من اللازم اثناء مزاولة الرياضه.
و لكن انصحكم بشيء واحد.

انصحكم بالإبتعاد عن مستشفي النزهة الدولي.
لقد احسست فيها بكل مشاعر اساتذة عين شمس.
حقا لقد كان اسمها سم شنيع، و قلبوا اسمها لتكون عين شمس.

صورة الكسور و الآشعه موجوده لأصدقائي الأطباء المحترمين.
و فيما قريب سأكت لكم لماذا لا تذهبوا لمستشفي النزهة.
فهي حقا نزهة لا تستحق التجربه.

إن لم تكن لك خطه ..........

إن لم تكن لك خطة.........

يولد الواحد منا بدون إرادته.
يعيش مع اهله و ابويه دون اختيارهم.
يذهب إلي المدرسه و يتعلم الإبتدائيه دون اختيار منه.
و في بعض الأحيان إلي الثانويه دون إراده له.

ثم تأتي لحظة اختيارك.
هل ستكمل الطريق ام تتوقف.
أي جامعه و كليه ستلتحق.
أي مهنه تريد ان تعمل بها.
و ما هي طاقاتك و إمكاناتك التي ستستغلها لتكون انت الأفضل.

المصيبة تحدث عندما يسيرك الآخرين وفقا لخططهم
عندما تكتب رغباتك في مكتب التنسيق وفق رغبات اهلك او آخرين.
عندما تتأخر ملكاتك و إبداعاتك لقبولك خطط الآخرين.

المصيبة الأكبر عندما يحدث هذا في عملك.
عندما تكون لديك احلام و آمال لأشياء عظيمه.
و يتحكم في احلامك آخرين تكن لهم الأحترام و فقط.

هل ستتوقف عن الحلم لعدم وجود مؤيدين لك فيه.
هل ستيأس و تتوقف عن المحاوله.
أم انك ستجتهد لتحقق احلامك و طموحاتك.

إن لم تكن لك خطة صرت احد مخططات الآخرين.

في الشركات و المجتمعات و حتي في العائلات.
إن لم تكن لك خطة سيتحكم بك الآخرين.

كمثال و انت صغير و يريد اهلك ان يذهبوا للمصيف في يوم ما.
يوقظوك من النوم، و يحضروا حقيبتك و يذهبوا بك.

هل قلت لهم لدي شيء افعله؟
لدي خطه اريد ان احقق فيها احد الأهداف اليوم؟

ليس لديك أي هدف.

هكذا الحال دوما لمن ليس لديه هدف.

كحديث رسول الله-صلي الله علي وسلم – قال
"لا يكن أحدكم إمعة ، يقول أنا مع الناس إن أحسن الناس أحسنت ، وإن أساءوا أسأت ، ولكن وطنوا أنفسكم إن أحسن الناس أن تحسنوا ، وإن أساءوا أن تجتنبوا إساءتهم"

فهو مثال لكل من يلغي عقله و يتركه للآخرين.

اكتشف مواهبك.
دافع عن قدراتك.
طور من إمكانياتك.
و لا تقف امام مخططات الآخرين.

هل ستفعل ما تحب و تجتهد لتحقق هدفك؟
أم ستحب ما تفعل و ترضخ للواقع؟

سأبدأ من جديد

لا اعلم لماذا اتوقف عن الكتابه؟
هل لأني لا اجد الوقت لكي افرغ محتوي رأسي في الكتابه؟
ام انني لا اتوقها؟

السبب الذى اراه حقيقيا وراء عدم قدرتي علي الكتابه هو وجود شيء آخر اجمل في حياتي يشغلني عن الكتابه.

عندما تعيش حلم جميل لا تريد الإستيقاظ منه.
عندما تكون في مكان خلاب تتمني عدم الخروج منه.
عندما تشاهد فيلما تتمني ان تكون انت بطل هذا الفيلم.
عندما تأكل شيئا تشتهيه و تتمني الا تنتهي منه أو تشعر بالإمتلاء عنه.

عندما تكون انت بطل هذه اللحظات الجميله، تتمني الا تنتهي و تدوم.

و لكن هذه المتعه هي سراب، و شهوات تعيشها.
هي احلام لا ينبني عليها عمل تحس بنتاجها.
خيالات تستيقظ منها فتعلم مدي سحرها.

هذا هو سبب انقطاعي عن الكتابه هذه الفتره.

هذا السبب هو جمال الحلم الذي اعيشه.
هو لحظات المتعة و الخيال التي انسجها في الحاضر و المستقبل.
هو الحياه التي يتمناها أي شخص، و لكن بدون عمل.

وجدت نفسي في احلي لحظات سعادتي.
ووجدت ان حلمي اتمني تحقيقه و ان اعيشه مع من رسمته معه.
و لكن وجدت انني احلم فقط، و النتيجة لا شيء.

انسى ان هذه الدنيا فانيه، و اننا جميعا ذاهبون إلي الآخره.
انسى ان علي واجب تجاه نفسي و اقرب الناس لي.
انسى واجباتي تجاه اهلي و بلدي.
انسى ترتيب الأولويات في حياتي.

يجب ان اتحرك بنفسي نحو اهدافي الساميه التي ارسمها.
نحو تحقيق الصورة و الحلم الذي اتمناه.

سأبدأ من جديد،
سأبدأ بالتحرك من اجل ما تمنيته.
سأرجع للكتابه بصوره منتظمه.
سأسعى نحو هدفي و سأساعد الآخرين لتلبية اهدافهم.

سيكون هناك من يعطلوني فلن اقف بجانبهم.
سيكون هناك من يثبتوني فسأشكرهم.
و سيكون من يمشون معي فسأخلص لهم.

سأعيش من اجل آخرتي.
سأعمل في دنياي من اجل ان ادخل الجنه مع من احب.

فهل سأفعل ما أحب، اعمل بجد من اجل الحلم الذي اتمناه مع اقرب الناس لي؟
ام سأحب ما أفعل، و اكتفي بالمشاعر المخلصه و الحلم الرائع دون عمل؟

اتسائل داخل نفسي و اتسائل معك ايها القارئ، أي الناس انت؟